पुणे जिल्ह्यातील हवेली तालुक्यातील शैक्षणिक व सामाजिक इतिहासात श्री शंभू महादेव देवस्थान ट्रस्ट, फुरसुंगीचे स्थान अनन्यसाधारण आणि प्रेरणादायी आहे. सन १९७५ मध्ये फुरसुंगी गावातील कार्यकर्त्यांमध्ये अश्या प्रकारचे विचार रुजलेले होते, अश्या ध्येयाची काही मंडळी होती की ज्यांनी ठरवले आपल्याला जर आपला विकास करायचा असेल तर स्वत: खंबीर बनले पाहिजे, स्वावलंबी बनले पाहिजे. आर्थिक पाठबळ निर्माण केले पाहिजे. याच विचाराने प्रेरित होऊन गावातील कर्तृत्ववान मंडळींच्या धडाडीने, आत्मविश्वासाने, महत्वाकांक्षा व जिद्दीने यापूर्वी गावच्या सर्वांगीण विकासासाठी कार्यरत असलेले ग्रामविकास मंडळाचे रुपांतर श्री शंभू महादेव देवस्थान ट्रस्ट, फुरसुंगी मध्ये करण्यात आले व दिनांक ०५ मे १९७६ रोजी त्याची नोंदणी MPT Act 1950 अंतर्गत मा.धर्मादाय सहआयुक्त पुणे विभाग. यांचेकडे करण्यात आली व संस्थेस नोंदणी क्रमांक A – 1406 प्राप्त झाला. संस्थेच्या योजनेमध्ये फुरसुंगी गावचा आर्थिक, सामाजिक, शैक्षणिक उत्कर्ष व्हावा यादृष्टीने धोरणात्मक व दिशा देणारी नियमावली तयार केली. फुरसुंगी गावाचे ग्रामदैवत व शिवकालीन परंपरा असणाऱ्या श्री शंभू महादेवाचे स्मरण नित्य होत राहो व समाजउपयोगी कार्य करण्यास प्रेरणा मिळत राहो म्हणून श्री शंभू महादेवाचे नावाने ट्रस्ट स्थापन करण्यात आला. ट्रस्टला ग्रामदेवतांचे वार्षिक सणवार उत्सव साजरे करता यावेत यासाठी शिवकालीन काळापासून केलेल्या तरतुदीनुसार १४ एकर इनाम शेत जमीन उत्पन्नाचा प्रमुख स्त्रोत म्हणून मिळाली.